Хан Бён Чёл: Орчин үед гоо зүй үгүйлэгдэнэ.

Солонгос гаралтай Герман философич Хан Бён Чёл орчин үеийн хэт эерэг, гөлгөр, бараа бүтээгдэхүүн болоод хэрэглээний шинжтэй нийгмийг өөрийн бүтээлүүдээрээ хайр найргүй шүүмжилсэн байдаг. Түүний бүтээлүүд дундаас Saving Beauty, 2018 философийн эссе орчин үеийн "гоо зүй" хямралд орж порнографик (хүсэл хангагч, илчилсэн, хамаагүй, хэрэглээний) шинжтэй болсныг шүүмжилж эсрэгээрээ жинхэнэ гоо зүй эротик (хүсэл өдөөгч, нууцлаг, хувь чанартай, хэрэглэх боломжгүй), өдөөгч, өөрийн бие даасан яруу чанартай байдгийг онцолжээ. Шинэ либерал засаглалд бүх зүйл өөрийн гэсэн үнэ өртөгтэй, хэрэглэгдэхүүний шинжтэй, юмс хямд олон тоогоор хэт хүртээмжтэй болсон нь хүний амьдралын адал явдалт, ээдрээт чанарыг үгүй хийж оронд нь хоосрол, гутралыг үүсгэж буй тухай энэ бүтээлдээ олон философич, уран бүтээлчдийн санаан дээр үндэслэн дурджээ.