Хүсэл хясал

Маажааны ширээн дээр гэгээн өдрөөр ч гэрэл асаатай, даалуу шаржигнах чимээний зэрэгцээ доржпалам эрдэнийн том жижиг шигтгээ нүд гялбуулна. Тэнийлгэн татаж ширээний хөлд бэхэлсэн цайвар бүтээлэг цагаан өнгөөр гялтганана. Зяжигийн энгэр цээжинд хурц гэрэл тусжээ. Бүсгүйн царай ч энэ гэрэлд тодрон үзэгдэнэ. Намхан дух, ташуу тайрсан үс нь түүний ялдам төрхөнд өнгө зүс нэмэх мэт. Бүсгүй будаггүй шахам, уруулаа л час улаан өнгөөр тодолжээ. Арагш самнасан гэзэг нь мөрөн дээр нь сул асгарч, хоёр гараа ширээн дээр тавьсан аж. Намхан дугуй захтай, өвдгөө хүрсэн урт цэнхэр турлэг нь европ загвартай даашинзтай их төстэй бөгөөд захан дээрээ тогтоосон чулуун хатгуур, индранил шигтгээтэй ээмэгтэй нь тун чиг чамин хосолжээ.