ДГ Сажа Богд бээр Бурхан Багш Номын хүрдийг эргүүлсэн дүйчин өдөрт адис хүртээн ном айлдав

Дээрхийн гэгээн Сажа Богд бээр Бурхан Багшийн Номын хүрдийг эргүүлсэн дүйчин өдөрт зориулж сүсэгтэн олонд Цогт Сажын Очирт Пүрэв сахиусны үүднээс Га-гой хүртээн ном айлдав. Сажын номын нөхдийн айлтгалын дагуу Дээрхийн гэгээн Сажа Богд бээр дэлхий нийт дэх Сажын~ нөхдийн сүсэгтэн олонд Бурхан Багшийн Номын хүрдийг эргүүлсэн дүйчин өдөрт зориулан бичлэгээр номын айлдар хайрлав. Дээрхийн гэгээнтэн бээр бичлэгт эхлээд Цогт Сажын Очирт Пүрэв сахиусны үүднээс Га-гой ( зарлигдан, саад тотгорыг үлдэн хөөх) хүртээн Билгийн тооллын 4 гол дүйчин өдрийн нэг болох энэхүү хосгүй дээд гэгээрлийн их үйлс эхэлсэн дүйчин өдрийн утгыг тайлбарлан хэрхэн буян номд шамдах зөвлөгөө хайрлалаа. Сажа Богд бээр энэхүү бичлэгийг сүсэг бишрэл төрүүлэн үзвээс Очирт Пүрэв сахиусны үүднээс Га-гойг баттай хүртэх юм хэмээн айлдав. Зуны сүүл сарын шинийн 4-ний билэгт энэ өдөр Бурхан багшийн номын хүрдийг анх эргүүлсэн өдрийг тэмдэглэн өнгрүүлдэг. Энэхүү өдөр нь төгс гэгээрэлд хүрсэн Бурхан багш анх удаа Энэтхэгийн Утар Прадеш мужийн Барнаси хотын хойд зах дахь Чоукханди суварганы туурьт “Хутагтын дөрвөн үнэн” хэмээх гүн гүнзгий сургаалаараа номын хүрдийг эргүүлсэн түүхэн үйл явдалтай холбоотой билээ.