БАТКАР БААСАН НАЧЫН МОГЕ.

Тыва Республиканың Начын мөгези Баасан Баткарга мактал Арзылаң-Күдеректиң куду сиңген Амгалың Күчүтенниң түрү кирген Мөңге көк дээрниң Хаан-Херети кужун Мөчү-бодунда хуулдуруп сыңырган Мөөңнешкен күштерниң эдилекчизи Мөөрейлиг оюннарның тиилекчизи Мөгүдээн буга дег ойтур таварыыр Мөндүңнээн шары дег доңгайтыр шелер Мөгеннер чүктээн адан дег көстүр Мөге Баасанны чалап тур оо! Кааң дээрден чаңнык дүжүрүп бадырган Калчаа далайдан каътташкак чалгыг кыйгырган Тоолчургу маадырның чоруун катаптаан Тос чүктүң судалын тудуп шинчилээн Бачымнаткаш, бажынга четкен Бадыткааш, балалбас исти артырган Хавырган аскыр дег хенертен келир Хажыктыг эмдик дег хенергеткеш салыр Хайып турда хаяачының мергени дег Хамыкты кайгаткан Баткар Баасанның содак-шудаа сыңмайн тур оо! Эзир-Уяның эдээн эжелей чурттаан Эрзин-Бажының эртинелерин ыдыктап дагаан Мурнуу чүктүң эрестиг чонунуң Мурнай дүжүрер шалыпкын мөгези Эр парның кокпазын эдерген Эчис-күзелдиң күштүүн шынзыткан Оран-чуртунга өөрүшкү хайырлаан Он сес чылдың нүүрүн бакылаан Экер эрниң чаяларын часкай туткулааш Эзирниң самынче девидип үндүрүңээр! Вадим Чыкай.