ВЛАДИМИР ЗЕЛЕНСКИЙ: «БІЗ СОҒЫСТЫҢ АЯҚТАЛУЫНА ЖАҚЫНДАДЫҚ»

Донецк облысындағы Славянск қаласы екі күннің ішінде екінші рет Ресейдің шабуылына ұшырады. Сол уақытта Украина президенті Владимир Зеленский соғыстың аяқталуына нақты алғышарттар пайда болғанын мәлімдеді. Ресей Днепропетровск облысындағы Павлоград қаласына соққы берді. Жергілікті әкімдіктің мәліметінше, инфрақұрылымдық нысан зақымдалып, өрт шыққан. Алдын ала деректер бойынша, атқылау салдарынан 16 адам зардап шекті, олардың 15-і ауруханаға жеткізілді, төртеуінің жағдайы ауыр. Қазанның 20-на қараған түні Ресейдің ұшқышсыз ұшу аппараттары Донецк облысының Славянск қаласына тағы да шабуыл жасады. Бұдан бір күн бұрын бес соғыс дроны қалаға соққы беріп, үйлер мен мектепті зақымдаған еді. Жергілікті биліктің мәліметінше, соңғы шабуыл кезінде «Герань-2» және «Молния-2» атты камикадзе-дрондар қолданылған. Олар жеке сектордағы тағы да бірнеше үй мен автокөлікті бүлдірген. Құрбандар мен жараланғандар жоқ. Сонымен қатар Ресей әскері Сум бағытындағы теміржол инфрақұрылымын атқылады. Кейбір пойыздар кідірістермен қатынап жатыр. Украина Қарулы Күштерінің Әуе күштерінің дерегінше, дүйсенбіге қараған түні Ресей Украинаға 60 соққы дронын және үш баллистикалық зымыран ұшырған. Президент Владимир Зеленский Жоғарғы Радаға әскери жағдай мен жалпы мобилизация мерзімін ұзарту туралы заң жобаларын енгізді. Қазіргі уақытта елде әскери жағдай мен мобилизация 5 қарашаға дейін күшінде. Осыған байланысты оларды тағы 90 күнге, 2026 жылдың ақпанына дейін ұзарту жоспарланып отыр. Президент ұсынған екі заң жобасы бойынша дауыс беру 21 қазанда парламентте өтеді. Егер олар мақұлданса, бұл әскери жағдай мен мобилизацияны он жетінші рет ұзарту болады. Украинадағы соғысты әлемдегі басқа қарулы қақтығыстармен салыстыруға болмайды, — деді Украина президенті Владимир Зеленский журналистерге берген сұхбатында.