Богдын хүрхрээ Episode 2
Богдын голын хүрхрээ нь манай улсын хамгийн том хиймэл хүрхрээ юм.Отгонтэнгэр хайрхнаас эх авч урсах Богдын голын урсгалыг 2,5 км урт сувгаар татан Тээг толгой дээрээс унал үүсгэн Богдын голын усан цахилгаан станцыг байгуулжээ.Алдархаан сумын нутагт орших Богдын голын усан цахилгаан станц нь 2000 кв-ын цахилгаан гаргаж Завхан аймгийн төв Улиастай хотыг зуны улиралд цахилгаан эрчим хүчээр хангадаг.Энэ станц нь 1997 онд ашиглалтад орсон бөгөөд 708м3 ус хуримтлуулах хүчин чадалтай юм.2000 онд ХБНГУ-ын буцалтгүй тусламжийн хөрөнгөөр станцын толгойн барилга байгууламж, ус дөхүүлэх суваг, түрэлтийн сан, ус халиагуур, түрэлтийн хоолойн тулгуур, хаях, сувгийг дахин шинэчилж, ашиглалтад оруулсан байна. Усны өндөр нь ойролцоогоор 15-20 метр унадаг. Өвөлдөө хөлдөж, мөсөн хүрхрээ болж маш өвөрмөц үзэмжтэй болдог. Эргэн тойрондоо ногоон ой мод, хад асга бүхий байгалийн сайхан зохицолтой хүрхрээ юм. Богдын хүрхрээ нь Завхан аймгийн төв Улиастай хотоос зүүн тийш 36 км-т оршдог.
