Уурхайн машин механизмын техникч хосмог сургалт таниулах өдөрлөгийг Өмнөговь ПК-д зохион байгууллаа
ХҮНД МАШИН МЕХАНИЗМЫН ХОСМОГ СУРГАЛТЫГ СУРТАЛЧИЛЖ, ОХИДЫН ОРОЛЦООГ ДЭМЖИЖ БАЙНА 2025 оны зургаадугаар сард Налайх болон Өмнөговь аймгийн Политехник коллежуудад уул уурхайн тоног төхөөрөмжийн техникчийн мэргэжлийг сурталчлах, хосмог сургалтын хөтөлбөрийг танилцуулах арга хэмжээг Transwest Mongolia, MSM Group, Sandvik Mongolia компаниудтай хамтран зохион байгуулав. Эдгээр арга хэмжээнд ерөнхий боловсролын сургуулийн 400 гаруй төгсөх ангийн сурагчид хамрагдаж, тус салбар дахь ажил мэргэжлийн чиг баримжаа, суралцах болон ажиллах боломжийн талаар мэдээлэл авлаа. Хосмог сургалтын хэлбэр нь онолын мэдлэгийг политехник коллежид эзэмшихийн зэрэгцээ Transwest Mongolia, MSM Group, Sandvik Mongolia зэрэг уул уурхайн салбарын тэргүүлэгч компаниудад дадлага хийх, цалинтай ажиллах боломжийг олгож байна. Мэргэжлийн практик туршлага, ажлын орчинтой танилцах энэхүү загвар нь төгсөгчдийн хөдөлмөр эрхлэх чадварыг бодитоор нэмэгдүүлдэг. Энэхүү арга хэмжээний гол зорилт нь уламжлалт байдлаар эрэгтэйчүүд давамгайлсан энэ мэргэжлийг охид, эмэгтэй сурагчдад нээлттэй, хүртээмжтэй гэдгийг харуулах явдал байв. Арга хэмжээний үеэр уул уурхайн салбарт ажиллаж буй эмэгтэй мэргэжилтнүүд өөрсдийн туршлагаа хуваалцаж, сурагчдад урам зориг өгсөн нь онцлох мөчүүдийн нэг байв. Мөн компаниудтай шууд харилцан ярилцаж, цаашдын боломж, ажиллах нөхцөл, дэмжлэгийн талаар мэдээлэл авсан нь оролцогчдын ирээдүйн сонголтод бодитой нөлөө үзүүлсэн юм. Энэхүү арга хэмжээ, хосмог сургалт нь “Хүнд машин механизмын салбарт жендерт мэдрэмжтэй хосмог сургалтаар эмэгтэйчүүдийг чадавхжуулах” төр-хувийн хэвшлийн түншлэл төслийн хүрээнд зохион байгуулагдаж байгаа юм. Уг төслийг ХБНГУ-ын Эдийн засгийн хамтын ажиллагаа, хөгжлийн яам (BMZ)-ны төр-хувийн хэвшлийн түншлэл DeveloPPP.de хөтөлбөрийн хүрээнд, Transwest Mongolia, MSM Group, Sandvik Mongolia компаниудын хамтарсан санхүүжилтээр, Германы Олон Улсын Хамтын Ажиллагааны Нийгэмлэг (GIZ) хамтран хэрэгжүүлж байна.
