The Busy Mom Diary By Uranklholboo Part44 (Охидын баллет, Гэр бүлийн элч, Номын баяр Амай, Эко тор)

Зуны эхэн сарын нарлаг сайхан өдрийн мэндийг хөөрхөн завгүй ээжүүд охидууд бүсгүйчүүддээ хүргэж байна. Японоос ирээд хийсэн ажлууд болон болсон үйл явдлуудаа хурайнгуулж багтаасан влогны маань шинэхэн дугаар та нарт маань хүрэхэд бэлэн боллоо. Таалан сууж тухлан үзнэ үү... Эрхэм хайрт эрх танхил Гүнжээ охины минь төрсөн өдөр боллоо. Гэр бүлээрээ гэртээ цомхон сайхан тэмдэглэлээ. Элдэв янзын бэлэг авч өгч эрхлүүлэхээс илүү бага балчираас нь биеийн өв тэгш хөгжилтэй, цэх нуруу цэмцгэр алхаатай, урлагийн мэдрэмжтэй, тэвчээртэй мундаг охин болоосой гээд Бүжка эгчтэй нь хамт Sunee's Ballet -д Б.Сүндэрьяа багшийн бондгор хөөрхөн шавь нарын нэг болголоо. Манай 2 баллетын хичээлдээ маш их дуртай байгаа. Олон улсын гэр бүлийн өдрөөр "Нийслэлийн Гэр Бүл Хүүхэд Залуучуудын Хөгжлийн Газар" манай гэр бүлийг "Гэр бүлийн элч" ээр сонгож өргөмжлөл гардуулсан нь үнэхээр их урам зориг өгөхийн сацуу давхар маш их хариуцлагын хамт манай гэрийн хойморт заларсан байгаа. Одоо НГБХЗХГ-тайгаа хамтраад гэр бүлийн сайн сайханы төлөө нийгэмд чадах бүхнээ хийж дуу хоолойгоо хүргэнэ гэсэн чин хүсэл эрмэлзэлтэйгээр төлөвлөгөөгөө гаргаж байна. Жил бүр уламжлал болгон зохион байгуулагддаг номын баяр дээр амжиж очсон байгаа. Олон сайхан зохиолчидтой уулзаж нэг хэсэгтээ л унших номнуудтай болсондоо үнэхээр баяртай байна. Тэр дундаас миний зорьж очсон эрхэм хүн бол Бат овогт Жамбалсүрэнгийн Золбаяр буюу бидний мэдхээр Амай Золбаяр байлаа. Гэрээ Улаанбаатар хотын төв цэг дээр бариад шинэхэн номын нээлтээ хийж ирсэн зочин бүрийг халуун дотноор гэртээ урин хоймортоо ханхайн суух түүнийг харахад ерөөс өвдөөгүй мэт... Гэвч энэ хүртэл ямар их хүч тэвчээр гарган энэ олон номыг хойч үедээ зориулж бичсэнийг нь харахад бахархахгүй байхын аргагүй. Бид ахиж уулзаж илүү олон зүйлийг ярихаар тохироод энэ удаагийн уулзалтаа өндөрлөсөн юм. Үзэгч эрхэм ээж нарыгаа уриалахад түүний бичсэн аялалын цуврал номнуудаас заавал худалдан авч түүнийг дэмжээрэй. Миний хамтран ажилладаг Sansar supermarket chain -ээс нэгэн сайхан ажлыг эхлүүлсэн нь DSAMmn Дауны Холбооноос гаргаж байгаа Даунтай хүүхэд залуусын бүтээлээр улам үнэ цэнэтэй болгосон эко даавуун торыг бүх сүлжээ дэлгүүрүүдээрээ худалдаалж эхэлсэн явдал юм. Та нар маань эко торыг хэрэглээндээ нэвтрүүлэхээр шийдсэн бол эргэлзэх зүйлгүй даунтай дүү нарын маань өөрсдийн гараар хичээнгүйлэн зурсан утга учир бүхий зурагтай торыг худалдан авч тэдний маань цаашдын гэрэлт ирээдүйд өөрийн багахан ч гэсэн хувь нэмрийг оруулаарай. Мөн өөрт ойр Сансар супермаркетын аль ч салбараас бяцхан үрсдээ хэдэн ч төгрөгний бэлэг авсан бай хамаагүй супер азтаны сугалаанд оролцоорой.