Ашукь Абдул "Селминаз"
Слова: Тагира Хуругского (1893-1958) Музыка: Ашуга Абдула (1900-1971) 1 Яшинда заз гьич Селминаз Хьтин гуьзел акурд тушир. Буйдиз кьакьан, гьич заз икьван Лацу мармар акурд тушир. Акьул дерин, мецел ширин, Шамси къемер акурд тушир. 2 Къемер беден, вич зериф, Хуьре гьатна ви тариф. Алахьай варз алай йиф, ТакIандаз вун жез гьайиф. Гьар са жуьре дердиниз Дарман ийидай ариф. 3 Арифвал пеше Кьуна гьамиша, Атирдин шуьше Гваз чиниз вун ша, Десте-десте къизил цуьквер, Лали беневша. Беневша цуьк экъечIна тик, Заз и тегьер акурд тушир . 4 Тегьер бичин, адан вичин ЛагьайтIа за, хъел къведа жал. АкI туш азиз первана хьиз За вич захъди гелкъведа жал. 5 Сармашух хьиз ярашугъ Зи бедендал элкъведа жал. Амма гуьзел ятIа эвел, Рахух акван, хъел къведа жал. Яхъ на суал, дагъдин марал, Белки ама заз къведа жал. 6 Ам дагъларин жейран я, Хатур хамир, аман я, ЦIемуьжуьд савай жаван я, Агакьнавай бустан я. Кьулухъ къвазмир бахтавар, Гьала къе ви девран я. 7 Девран я керчек, Вич пара гуьрчег, КIвалахиз зирек, Гуьзелвилиз тек, Фаргьад хьтин эхир вуна Ида зун гьелек. Гил тахьана зав рикIивай Лали гевгьер акурд тушир. 8 Гевгьер хьтин, ашкъи рикIин Артух хьана югъ-къандавай. Эхир Мажнун хьиз вуна зун Ида, гуьзел, зи чандивай. РикIиз аман, жедач дарман, Валай гъейри Лукьмандивай. Лукьман хьиз це дикъат, Гуьзел я вун гьакъикъат. Тамам цуькведиз нисбет. Къубада, гьам Куьреда Ава ви суьгьбет 9 Суьгьбетдиз зурба Кавказдиз алма, Арандин хурма, ЧIарар са фурма, Бухарадин хъицикь хьтин Элкъвена бурма, Сур хьиз гуьрчег, хъуьтуьл ипек, Зардин кифер акурд тушир. 10 Кифер тIарам, ажеб хуррам, Билбил хьтин рахада вун. Кьилел жуна алай суна, Марал хьтин аквада вун. РикIик са гъам квачиз, тIарам Жейран хьтин къугъвада вун. Акурдаз акуна Селминаз. Такурдаз мус ахквада вун. Якъин чир хьухь, Дагъустанда Ава анжах аватIа вун. 11 Икьван бахтавар, ширин Дигай бахча, бар ширин, Гъана ава нар ширин, Беден гимиш, тIвар ширин, Бахтавар хьуй жагъайдан Икьван гуьзел яр ширин. Ширин тир кишмиш, Бустандин емиш, Хьанва хьи битмиш, Гьайиф жез уьтмуьш, Ашукьдиз гзаф хьана бегенмиш. Гьакьекь хьтин заз и саягъ Катран вилер акурд тушир.
