ХЭҮК-ын гишүүн Х.Мөнхзул:

"Хүчирхийлэлд өртсөн хохирогч эмэгтэйчүүд нөхрөө хориулъя гэж боддоггүй. Аль болох эрт шатанд нь ойлгуулаад өгөөч, зогсоогоод өгөөч, ухамсарлуулаад өгөөч гэдэг. Гэвч бидэнд эрт шатанд зогсоох арга хэмжээ байхгүй байна" Гэр бүлийн хүчирхийллийн хохирогчдод үзүүлэх үйлчилгээний чанар хүртээмжийг сайжруулах нь сэдэвт зөвлөлдөх уулзалт боллоо. Энэ үеэр ХЭҮК-ын гишүүн Х.Мөнхзул "Монгол Улсад жендэрт суурилсан хүчирхийлэл буюу гэр бүлийн хүчирхийллийн асуудлаар хууль эрх зүйн орчин харьцангуй сайн. Гэвч хэрэгжилт хангалтгүй байна. Хуулийн хэрэгжилт хангалтгүй байгаад нөлөөлж буй нэг асуудал хуулийн хэрэгжилтэд тогтмол мониторинг, үнэлгээ хийх байдал хангалтгүй байна. Мөн хуулиар үүрэг хүлээсэн байгууллагуудын уялдаа холбоо сул, хариуцлага тооцож хяналт тавьдаггүйтэй холбоотой юм. Гэр бүлийн хүчирхийлэл буурахгүй байгаагаас харахад, тогтолцооны түвшинд авч үзэх хэрэгтэй. Урьдчилан сэргийлэх ажил уялдаа холбоогүй, хязгаарлагдмал төслөөр салангид хийгдэж байна. Жендэрт суурилсан хүчирхийлэл, гэр бүлийн хүчирхийллийн суурь шалтгаан руу чиглэсэн төлөвлөгөө, санхүүжилттэй цогц арга хэмжээ дутагдалтай байна. Хохирогч хамгааллын асуудал зайлшгүй чухал. Сүүлийн жилүүдэд нэг цэгийн үйлчилгээ, түр хамгаалах байрыг нэмэгдүүлж байгаа ч хүний нөөц, санхүүжилт хангалттай биш байна. Хөгжлийн бэрхшээлтэй иргэн, ахмад настан, хүүхдэд зориулсан төрөлжсөн үйлчилгээ байхгүй байна. Жишээ нь: хөгжлийн бэрхшээлтэй хүн хүчирхийлэлд өртсөн тохиолдолд хэлмэрчлэх хүн байхгүй, хаана хандахаа мэдэхгүй байна.  Гэр бүлийн хүчирхийлэл давтагдах тусам даамжирч, далд хэлбэрт шилжиж байдаг. Гэр бүлийн хамаарал бүхий, сэтгэл зүй, эд материалаар холбогдсон хүмүүс дунд үйлдэгдэж байгаагаас ногдуулж байгаа шийтгэлийг мөн бодолцох хэрэгтэй. Хүчирхийлэлд өртсөн хохирогч эмэгтэйчүүд нөхрөө хориулъя гэж боддоггүй. Аль болох эрт шатанд нь ойлгуулаад өгөөч, зогсоогоод өгөөч, ухамсарлуулаад өгөөч гэдэг. Гэвч бидэнд эрт шатанд таслан зогсоох арга хэмжээ байхгүй байна" гэв.