“НҮҮДЭЛЧДИЙН ЕРТӨНЦ:ТҮҮХ,ӨВ,СОЁЛ” Олон улсын эрдэм шинжилгээний хурал амжилттай зохион байгуулагдлаа

“Нүүдэлчин” Дэлхийн соёлын фестивалийн хүрээнд Монголын уугуул аж ахуй, нүүдэлчдийн өв соёл, зан заншлыг судалж, түгээн дэлгэрүүлэх, хамгаалан өвлүүлэх, цаашлаад нүүдлийн соёл иргэншлийн төв, тэргүүлэх улс болгон хөгжүүлэх зорилготой “Нүүдэлчдийн ертөнц: Түүх, өв, соёл” олон улсын эрдэм шинжилгээний хурлыг 2025 оны 8 дугаар сарын 20-нд Чингис хаан Үндэсний музейд амжилттай зохион байгууллаа. Энэхүү хуралд Монгол, Их Британи, Киргизстан, ОХУ-ын Буриад улс, Холбооны Бүгд Найрамдах Герман зэрэг улс орноос, нэрт эрдэмтэн судлаачид хүрэлцэн ирж, 10 байгууллагыг төлөөлөн 11 илтгэлийг хэлэлцүүлэв. Хурлыг Соёл, спорт, аялал жуулчлал, залуучуудын яам, Соёл урлагийн газар, Чингис хааны өв соёлын хүрээлэн, Чингис хаан Үндэсний музей, Нүүдлийн соёл иргэншлийг судлах олон улсын хүрээлэн, мөн Бурхан Халдун уулын хамгаалалтын захиргаатай хамтран зохион байгуулсан юм.