Марина Попова: Биллэр-көстөр дьоммут үтүөлэрин өрө тутуоҕуҥ
Марина Константиновна Попова кэс тыла: Улуу дьоммут үчүгэйдэрин эрэ туһунан кэпсиир буолуҥ. Сыыһаларын, алҕастарын хаһан да хасыһымаҥ, ахтымаҥ. Бу кэпсэтии 2011 сыллаахха Марина Константиновна дьиэтигэр уһуллубута. Оччолорго сэллик бырааһа, Хаҥаласка аҕабыт дьиэ кэргэнигэр төрөөбүт Григорий Кокшарскай туһунан биэриини уста сылдьыбытым. Уонна норуот тапталлаах ырыаһыта Марыына Попова Кокшарскайга ураты махталлааҕын туһунан истибитим - Москубаҕа үөрэнэ барарыгар сэллик балыыһатыттан Григорий Михайлович киниэхэ ыарыыта суоҕун туоһулуур ыспараапканы биэрэн, кыыс ырыаһыт буолар баҕата туолбута. Марыына Константиновна эппитинэн, кини сэлликтээх дьону кытта чугастык алтыһан, быраастар кэтэбиллэригэр сылдьар кэмэ эбит. Онон ыспараапкаттан матыан даҕаны сөптөөҕө. Биһиги тапталлаах ырыаһыппыт үтүөҕэ махтанары сатыырын уонна алтыспыт, бииргэ үлэлээбит дьонун ытыктыырын бу кэпсэтииттэн өйдүөххүт дии саныыбын.
