Монгол төрийн мэргэн сайд, Бодлогот баатар Бавуудайн Цэнд

Монголын нууц товчоог анх удаа хятад хэлнээс монгол хэлнээ хөрвүүлсэн Монгол төрийн мэргэн сайд Бодлогот баатар Б.Цэнд Гүний цээж баримлыг музейн эрдэм шинжилгээний номын сангийн уншлагын танхимд (2025.09.26) заллаа. Мөн энэ үеэр доктор профессор Г.Мягмарсамбуу “Монгол төрийн мэргэн сайд, Бодлогот баатар Бавуудайн Цэнд” хэмээх номоо Монгол-Англи хэл дээр хэвлүүлэн гаргаж нээлтээ хийлээ. “Бодлогот Баатар Цэнд Гүн” ТББ 2016 онд байгуулагдаж, түүний нэрэмжит шагналыг 2017 онд бий болгон МНТ судлал, Монголын түүх, уламжлал, соёлын өвийн чиглэлээр судалгаа хийж, түгээн дэлгэрүүлэх үйлсэд үнэтэй хувь нэмэр оруулсан эрдэмтэн судлаачдад олгосоор ирсэн. Энэ жил анх удаа МНТ дахь түүх,угсаатны зүйд холбогдох академик судалгааг мэргэжлийн өндөр түвшинд хийж, МНТ-г дэлхийн дахинд таниулах, залуу хойч үеийн мэргэжилтэн бэлтгэх үйлсэд үнэтэй хувь нэмэр оруулсан ШУА-ийн Түүх, угсаатны зүйн хүрээлэнд Цэнд гүнийн нэрэмжит шагнал “Батламж” нэг сая төгрөгийг гардуулан өглөө. Мөн Чингис хаан Үндэсний музейн номын сангийн баяжилтад үнэтэй хувь нэмэр оруулж, ном бүтээлээ хандивласан“Бодлогот Баатар Цэнд Гүн” ТББ-ын тэргүүн Д.Начин, доктор профессор Г. Мягмарсамбуу нарт Чингис хаан Үндэсний музейн “Батламж”-ийг дурсгал болгон өглөө.